VMRO-DPMNE-ja mohon zërat që deputetë të caktuar të saj i janë nënshtruar përpjekjes së pushtetit dhe kanë pranuar të mbështesin ndryshimet Kushtetuese. Nga partia e Mickoskit thonë se vazhdimi i seancës për ndryshimet kushtetuese, do ta vërtetonte këtë.
“Vetëm spekulime, blerje kohe dhe mbjellje të dyshimeve në opinion dhe asgjë më shumë. Që sot le ta caktojnë seancën të cilën e ndërprenë në kundërshtim me Rregulloren më 18 gusht dhe do të përballen me realitetin, a kanë ose jo deputetë për ndryshim të Kushtetutës me diktat bullgar”, tha Dafina Stojanovska, VMRO-DPMNE.
Nga ana tjetër, pavarësisht kritikave, nga fronti opozitar shqiptar thonë se nuk e kanë tërhequr mbështetjen e tyre për ndryshimet kushtetuese por dyshojnë në qëllimet e pastra të pushtetit.
“Lëvizja Besa si subjekt politik por edhe fronti opozitar pjesë e së cilit janë Lëvizja Besa, Lëvizja Demokratike dhe Alternativa gjithmonë kanë qenë të përkushtuar në rrugëtimin euroatlantik por edhe në procesin integrues të vendit tonë në unionin evropian. Ne nuk kemi dyshime se Maqedonia e Veriut vendin e ka në familjen e madhe evropiane mirëpo dyshimet tona janë se aktorët politik të subjekteve politike qeveritare e kanë të njëjtin qëllim, duke pasur parasysh se dita ditës në sjellin nga një skandal korruptiv, na sjellin nga një aferë apo veprime që janë në kundërshtim me vlerat evropiane”, tha Fatmir Sabriu, Besa.
Seanca për ndryshimet kushtetuese ka filluar më 18 gusht kurse vazhdimi i saj nuk është caktuar akoma. Për momentin, të sigurt që do ta mbështesin nismën në këtë fazë janë rreth 70 deputetë kurse pushteti është në përpjekje të sigurojë 80 vota. /Alsat.mk