Kombëtarja e Gjermanisë ka njoftuar se e ka shkarkuar nga pozita e trajnerit Hansi Flick.
Shkarkimi i Flick vjen pas humbjes turpëruese nga Japonia, në një ndeshje miqësore që përfundoi me shifrat 4:1.
Pak më shumë se nëntë muaj nga ndeshja hapëse e Euro 2024 – e cila do të zhvillohet në Gjermani – nikoqiri i turneut pësoi një humbje 4:1 kundër Japonisë në “Volkswagen Arena” të Wolfsburgut.
Kjo humbje ishte e treta radhazi e Gjermanisë në miqësore, pas dështimeve në muajin qershor kundër Polonisë dhe Kolumbisë, dhe e çoi ecurinë pa fitore të gjermanëve në pesë ndeshje.
Duke folur pas vendimit për të liruar Flick nga detyrat e tij, presidenti i Federatës Gjermane të Futbollit (DFB), Bernd Neuendorf tha:
“Komiteti ra dakord që kombëtares gjermane i duhet një shtysë e re pas rezultateve zhgënjyese të fundit. Duke shkuar në Kampionatin Evropian verën e ardhshme, ne kemi nevojë për besim dhe optimizëm në ekipin tonë”.
Rudi Voller, Hannes Wolf dhe Sandro Wagner, do të marrin përkohësisht drejtimin e Kombëtares së Gjermanisë për miqësoren ndaj Francës që do zhvillohet në Dortmund.