Në Universitetin e Prishtinës, përkatësisht në Fakultetin Filozofik dje u shënua 45-vjetori i Demonstratat e vitit 1981, një ngjarje me rëndësi të veçantë në historinë moderne të Kosovës.
Aktiviteti u organizua në bashkëpunim me Shoqata e të Burgosurve Politikë, Shoqëria LËVIZJA dhe Fakultetin Filozofik, dhe u hap nga Bekim Baliqi, i cili theksoi se demonstratat e vitit 1981 janë të pandashme nga historia kombëtare dhe kanë ndikuar drejtpërdrejt në ngritjen e vetëdijes kombëtare, si dhe në artikulimin e kërkesave për liri, pavarësi dhe dinjitet njerëzor.
Në fjalën e tij, Baliqi nënvizoi se roli i studentëve mbetet thelbësor edhe sot, ndonëse sfidat kanë ndryshuar, duke theksuar nevojën për ruajtjen e kujtesës kolektive dhe zhvillimin e debatit kritik në shoqëri.
Në hapje të aktivitetit përshëndetën edhe Mentor Hasani, Shefit Sadiku dhe Xhevat Gjini.
Në kuadër të sesionit të referimeve, kumtesa dhe diskutime mbajtën: Bujar Dugolli, Sabile Keçmezi, Hydajet Hyseni, Bajram Kosumi dhe Murat Musliu, të cilët trajtuan dimensione të ndryshme historike dhe politike të demonstratave dhe ndikimin e tyre në zhvillimet e mëvonshme në Kosovë.
Një moment i veçantë i aktivitetit ishte edhe dëshmia përmes video-mesazhit e ish të burgosurës politike Zyrafete Kryeziu-Manaj, e cila ndau përvojën e saj nga koha e demonstratave, duke rikujtuar sakrificat dhe qëndresën e brezit të saj.
Në tryezë morën pjesë ish të burgosur politikë, studentë dhe profesorë, duke e bërë këtë përvjetor një hapësirë të rëndësishme reflektimi dhe diskutimi ndërbrezor.
Aktiviteti u moderua nga Mentor Hasani dhe u përmbyll me diskutim të hapur me pjesëmarrësit, ku u theksua rëndësia e ruajtjes së kujtesës historike dhe e vazhdimit të studimeve mbi ngjarjet që kanë formësuar rrugëtimin e Kosovës drejt lirisë dhe shtetësisë.(INA)