SHGM DHE GAZETARËT PRESIN TË NDRYSHOHET QASJA E KOMUNËS SË TETOVËS
Kasami pretendon se është transparent por kështu nuk mendojnë gazetarët nga tetova të cilët kanë reaguar për mos transparencë. Përmes Shoqatës së Gazetarëve me letër I janë drejtuar kreut të komunës së Tetovës Kasami të cilit i kanë kërkuar takim për të zgjidhur dilemet dhe sjelljen e tij ndaj mediave.
Në mënyrë selektive janë larguar disa gazetarë nga mail lista e komunës nga janë pranuar ftesat dhe njoftimet për zhvillimet në Tetovë.
Për këtë arsye gazetarët e Tetovës bojkotuan sot Kasamin duke mos i bërë asnjë pyetje tjetër përveçse kur do t’i japë fund kësaj jotransparence dhe nëse ka ndonjë plan për t’u takuar me gazetarët e Tetovës.
“Sigurisht që kemi pranuar reagimin e SHGM-së. Ju e dini shumë mirë që ne si komunë mund të krenohemi se jemi të hapur jo vetëm ndaj mediave, por edhe ndaj opinionit publik. Kjo ndoshta është një pamundësi momentale e qendrës për komunikim me mediat, por edhe unë si kryetar i komunës kam qenë gjithmonë i gatshëm t’u përgjigjem të gjitha pyetjeve tuaja,” tha Kasami.
Një ditë më parë, SHGM-ja kishte dërguar një letër ankesë në adresë të Komunës së Tetovës dhe kryetarit Kasami, duke kërkuar një takim të përbashkët me gazetarët.
Në reagimin e saj, SHGM-ja theksoi rëndësinë që gazetarët të jenë të mirëinformuar, në mënyrë që të informohet saktë edhe publiku.
SHGM-ja dhe gazetarët presin një ndryshim të qasjes nga Komuna, ndërkohë që kryetari Kasami deklaron se është i hapur për bashkëpunim. Megjithatë, mbetet për t’u parë nëse do të ketë një takim të përbashkët që do të zgjidhë këto mospajtime dhe të rivendosë bashkëpunimin.