Atletico Madrid ka nënshkruar një marrëveshje prej 82 milionë funtesh me sulmuesin e Manchester Cityt dhe Argjentinës, Julian Alvarez.
Alvarez ka nënshkruar një kontratë gjashtëvjeçare me skuadrën e Diego Simeone. Ai e ndërroi Manchester me Madridin pas dy vjet e gjysmë të suksesshme, duke mbledhur gjashtë trofe ndërsa ka shënuar 36 gola në 103 paraqitje.
Pasi mbërriti nga River Plate në një marrëveshje me vlerë 14 milionë funte në janar 2022, shitja e tij përfaqësoi një fitim të madh për Cityn.
“Sot i them lamtumirë këtij klubi të mrekullueshëm, me shumë emocione. Këto kanë qenë dy vite shumë të veçanta. Gjatë kësaj kohe, unë jam rritur dhe kam mësuar shumë – si lojtar dhe si person. Drejtorëve dhe stafit teknik, faleminderit për besimin dhe mbështetjen. Mësimet dhe vizioni juaj më kanë ndihmuar të zhvillohem kaq shumë. Për bashkëlojtarët e mi, faleminderit për çdo moment që kemi ndarë, për përpjekjen dhe përkushtimin në çdo seancë stërvitore dhe çdo ndeshje. Kam mësuar shumë nga secili prej jush dhe mbetem me kujtime dhe miqësi që do të zgjasin përgjithmonë”, ka thënë Alvarez pas largimit nga City.