Klinikën Universitare për Fëmijë në Shkup vazhdojnë ta tronditin rastet e shpeshta të vdekjeve të fëmijëve, duke ngritur shqetësime serioze për trajtimin dhe kushtet në këtë institucion shëndetësor. Rasti më i fundit ka ndodhur para tre ditësh, ku një fëmijë 9-vjeçar humbi jetën, duke shtuar edhe një tjetër humbje të rëndë për familjet dhe shoqërinë.
Prindërit dhe opinioni publik janë të shqetësuar për mungesën e reagimit nga autoritetet shëndetësore, përfshirë ministrin e Shëndetësisë, Arben Taravari. Edhe pse situata kërkon një përgjigje urgjente, ministri nuk ka ndërmarrë ende masa konkrete për të adresuar problemet që po prekin një nga klinikat më të rëndësishme për trajtimin e fëmijëve në vend.
Për më tepër, sot ministri Taravari është nisur për një udhëtim drejt Shteteve të Bashkuara të Amerikës, duke lënë pas shqetësimet e ngritura për sistemin shëndetësor. Kjo lëvizje ka shkaktuar reagime të ashpra në rrjetet sociale dhe mes qytetarëve, të cilët kërkojnë llogaridhënie dhe ndërhyrje të menjëhershme për përmirësimin e kushteve në Klinikën Universitare për Fëmijë.
Situata mbetet e tensionuar, ndërsa opinioni publik kërkon që prioriteti të jetë shpëtimi i jetëve të fëmijëve dhe jo udhëtimet zyrtare jashtë vendit.