Zëdhënësja e LSDM-së, Bogdanka Kuzeska, deklaroi se policia nuk e ka kryer detyrën e saj lidhur me arratisjen e ish-zëvendëskryeministrit Artan Grubi nga vendi. Sipas saj, ministri i Punëve të Brendshme, Pançe Tashkovski, nuk duhet të shihet si “hero, por si një ministër i paaftë.”
Në një konferencë për shtyp, Kuzeska zbuloi se nuk bëhet fjalë për një gabim të policisë, por, siç tha ajo, për një koordinim për lejimin e arratisjes së Grubit. Ajo e cilësoi këtë si një skandal të përmasave epike.
E vërteta e parë për të cilën hesht Tashkovski është se kontrolli në Bllacë, vendosur pranë rrethrrotullimit, ka dështuar plotësisht, tre ditë para arratisjes. Pse Tashkovski hesht për faktin se ata policë nuk kishin udhëzime dhe nuk e dinin kë duhej të prisnin dhe të kontrollonin? A janë lënë qëllimisht pa asnjë udhëzim? – tha zëdhënësja e LSDM-së.
Për dy policët në pikën kufitare “Bllacë” që lejuan kalimin e Grubit, Kuzeska tha se njëri prej tyre, personi B.J., është zyrtar i emëruar në atë pozicion pasi Tashkovski mori detyrën si ministër.
Me urdhër të Tashkovskit, B.J. është transferuar në kontrollin e pikës kufitare, megjithëse më parë ka kryer një detyrë tjetër që nuk kishte lidhje me kontrollin e kufirit. Kjo do të thotë se personi që lejoi kalimin e Grubit është zgjedhja personale e tij për atë pozicion. E pyesim Tashkovskin: A është e vërtetë që, për këto arsye, B.J. u vendos në këtë pozicion për të kryer veprime të tilla? – pyeti Kuzeska.
Sipas saj, polici ka marrë raport mjekësor për pushim, pikërisht ditën kur lejoi kalimin e ish-zëvendëskryeministrit.
Me këtë, ai nuk mund të suspendohet përderisa zgjat raporti i tij mjekësor. Pse Tashkovski gënjen se janë pezulluar, kur kjo nuk është bërë? A po përpiqet ta mbrojë atë, apo po pret që situata të harrohet? Pse nuk është ngritur një kallëzim penal ndaj policëve, por vetëm një pezullim i supozuar, kur bëhet fjalë për një vepër për të cilën mund të ngrihet kallëzim penal? – theksoi zëdhënësja e LSDM-së.